Ginawelcome sang secretary general sang Sentrong Samahan ng mga Tsuper at Operators ng Negros (SSTONE) ang ginaduso nga fuel subsidy sa idalom sang Bayanihan 2 ukon Bayanihan to Recover as One Act.
Ginpahayag kahapon sang Department of Transportation nga may nakapain nga 2.6 billion pesos nga ayuda sa public transport sector sa idalom sang Bayanihan 2.
Sa interview sang Bombo Radyo Bacolod kay Jessie Ortega, ginpahayag sini nga maayo man nga tikang ang ginaduso sang Department of Transportation (DOTr) nga mahatagan sang assistance ang public transport sa idalom sang Bayanihan 2 Act apang kuntani suno sa iya, indi sila pagpasaligon sa wala man nagatupa.
Nagalaom ini nga kun matabo gid man ini, makadto ang assistance sa driver kag indi sa mga operator.
Ginpahayag man ni Ortega nga dako na nga bulig ang fuel subsidy sa mga drivers bangud sa krisis nga ginapangatubang sa karun kag apektado man ang biyahe.
Apang nagakadismaya man ini nga ang nagapulos sang subsidy para sa mga driver ang kalabanan mga operators sang mga pampubliko nga salakyan kaangay lamang sang Pantawid Pasada Program.
