Ginklaro sang kampo ni Vice President Sara Duterte nga ang gina-alegar wala sang cash on hand kag bank deposits sa iya Statements of Assets, Liabilities, and Net Worth (SALN) humalin 2019 tubtob 2024 ang wala nagakahulugan nga wala ini gindeklarar.
Suno kay Atty. Michael Poa, spokesperson sang depensa sang Bise Presidente, ang nasambit nga mga assets ang gintingob sa kategorya sang “others” sa bahin sang personal properties sang SALN.
Ginpaathag niya nga sa baylo nga ilista ini isa-isa, ang kwarta, alahas, kag iban pa nga personal nga mga pagkabutang ang gin-grupo sa isa ka line item.
Suno sa kampo sang bise presidente, ila ipaathag kun ngaa nagbag-o ang pamaagi sang pagpresentar sang SALN, bangud sa mga nakaligad nga mga tinuig, separado ang listahan sang cash.
Ginpanindugan sang iya abogado nga ginapahanugutan ang paggrupo-grupo sang magkapareha nga personal properties sa SALN kag indi ini indikasyon nga ginatago ni VP Sara ang iya manggad.
