Gindagdagan na sang notice to explain ang cashier sang City Treasurer’s Office nga nagtamper ukon nagretoke sang resibo.
Madumduman nga ginreklamo sang isa ka motorista ang nabaton sini nga resibo matapos nga nagbayad ini sang P1,300 sa City Treasurers Office apang ang naggwa sa resibo nga na-print sang computer amo nga P300 lang, kag ini ang gin-tamperan lang sang cashier kag ginsulatan sang P1,300 nga numero.
Kasubong man nga naka-print ang tinaga nga “three hundred pesos only” apang ini man ang gin-tamperan sang cashier kag ginsulatan sang “one thousand three hundred pesos only”.
Nakita naman sa record sa computer nga P300 lang ang na-encode apang P1,300 ang ginbayaran sang motorista.
Sa interveiw sang Bombo Radyo kay Bacolod City Legal Officer Atty. Romeo Carlos Ting Jr., ginahulat na lamang ang sabat sang cashier sa ginpadala nga notice to explain sa iya.
Suno diri, posible nga sa masunod nga semana igadagdag ang show cause order sa empleyado kag kun maverify nga may sala ini, siya ang pagadagdagan sang preventive suspension.
Samtang, nahatagan man sang notcie to explain si Bacolod Traffic Authority Office Head Patrick Lacson kag BTAO deputy officer-in-charge Jose Antonio Robello, apang si Lacson pa lamang ang nakapasa sang sabat kag ginahulat pa ang kay Robello.
