Patay ang isa ka lalaki matapus nga ginluthang sa CL Ledesma Avenue, Barangay 2, ciudad sang San Carlos, Negros Occidental, sang Agosto 27 sang gab-i.
Ginkilala ang biktima nga si Jerome Ducay, 37, casual employee sang Local Government Unit sang San Carlos City, residente sang Campo Siete, Barangay 5, sa nasambit nga cuidad.
Sa interview sang Bombo Radyo Bacolod kay Police Major Ryan Villasario, Deputy Chief of Police sang San Carlos City Police Station, nagpadulong sa tiyangge si Ducay agud kuntani nga magpa-cash out sang kwarta gikan sa money wallet sang hinali na lang ini ginpalapitan sang suspek kag gintiro sang makatatlo ka beses.
Suno kay Villasario, ang biktima ang nakaagom sang pilas sa nawong kag dughan nga ginalantaw rason sang kamatayon sini.
Suno diri, santo sa ila imbestigasyon, si Ducay ang saksi sa insidente sa shooting incident sa nasambit nga cuidad sang tinalikdan nga Hulyo 28.
Ginapahayag nga nagalantaw sang TV si Ducay kaupod ang biktima nga si Raymund Canoy sang ginsulod ang nasambit nga balay kag ginpaarakan sang luthang si Canoy.
Patay si Canoy samtang nangin saksi naman sa kaso si Ducay bangud na-identify sini ang nawong sang suspek.
Bangud kay Ducay, dalayon nga natumod ang nagpatay kay Canoy kag napasakaan ini sang kaso.
Ginalantaw sa karon sang kapulisan nga posible gindumtan si Ducay apang wala man nila ginadula ang posibilidad nga si Ducay gid man ang target sang pagpangluthang sadtong Hulyo 28 apang si Canoy ang naigo sang gunman.
