Nakapagwa na sang opisyal nga statement ang presidente sang Bacolod City Government Employees Union (BCGEU) angot sa gin-alegar ginserbe nga pan-os nga pagkaon sa ginpatigayon nga employee’s night sang tinalikdan.
Sa interview sang Bombo Radyo Bacolod kay Bacolod City Administrator Atty. Mark Mayo, napahibalo na sila sang public statement kag nakita didto nga may yara gid man sang napan-os nga pagkaon sa bahin sang duha ka mga caterers/suppliers.
Ginatudlo man nga rason nga napan-os ang pagkaon ang bangud sa mainit nga panahon.
Suno kay Mayo ang BCGEU ang magapatuman sang sanctions santo sa nakasaad sa ila nga contract of service bangud ang tagsa ka supplier ang may yara sang kaugalingon nga kontrata sa employees union.
Ang pagpanghangkat nalang sa karun amo ang pag-quantify kun pila ang nagkalapan-os nga pagkaon bangud ang ibayaran nalang amo ang mga pagkaon nga wala napan-os.
Ang caterer ang nagsupply sang pagkaon nga tag P200 kada isa sa masobra sa 6,000 nga empleyado.
Sa kontrata, dapat ang pagkaon ang gindeliver antes ang alas 3:00 sang hapon bangud para ini sa panyapon sang mga empleyado.
Suno kay Mayo kun indi maubos utilize ang P1.3 million nga para sa pagkaon dapat nga ibalik ini sa City Government.
Ginpahayag man sini nga indi man mablack list ang caterers bangud wala man ang mga ini nag-agi sa bidding.
