Nagapanindugan ang tag-iya sang catering services nga Big Belly Food-to-Go nga wala sila sang pan-os nga pagkaon nga ginserbe sa State of the City Address ni Bacolod City Mayor Alfredo Benitez sang Hulyo 5.
Suno kay Darwin Castaneda, wala ini gilayon nga nakahatag sang iya statement matapos maggwa ang alegasyon nga pan-os ang iban nga pagkaon nga ila ginserve bangod nag-imbistigar ini sa iya mga katawhan nga present sadtong SOCA sang alkalde.
Suno diri, wala gid sila sang may nabaton nga reklamo samtang yara pa sila sa venue kun sa diin yara ini mismo nga nagsupervise sa pagtrabaho sang iya empleyado.
Pahayag ni Castaneda, madamo pa gani sang nagpalapit sa ila para magpasalamat.
Ang lengua nga ginreklamo nga pan-os, suno kay Castaneda, naubos ini sang timprano pa.
Ila ini ginpreparar kapin alas 3 ukon alas 4 sang hapon kag sila nag-abot sa SOCA, pasado alas 5 sang hapon, ang Macaroni, ang ila ginluto nga italian style gani posible nga wala naanad ang mga tawo sini kag indi man malikawan nga indi madunot ang salad apang preska man ang mga ingredients nga gingamit diri.
Dugang pa nga ang nagalapta nga picture sang pan-os nga lengua ang may nakalakot nga mushroom apang ang ila pagluto sa lengua ang wala sang ingredients nga mushroom.
Pahayag ni Castaneda, sa lima ka tuig nila nga pagcater, subong pa gid lamang sila nakabaton sang reklamo.
Makaagi naman ini nga nagcater sa Malacanang kag Presidential Communications Office.
Sa karun nga natabo, dako ang nangin epekto sini sa ila nga negosyo kun sa diin madamo sang nagkansela sang order.
Mensahe sini sa tagsa nga indi magpati sa kun ano lang ang makita kag maghibalo sa kun ano ang kamatuoran, samtang sa mga madugay naman nila nga kilyente, suno kay Castaneda, nakahibalo na ang mga ini kun ano sila maghatag sang serbisyo.
