Nagpanindugan ang Cauayan Municipal Police Station nga wala sang kamatuoran ang alegasyon sang pamilya sang subject person sa drug buybust operation nga gingamo ang ila balay kag may ginkuha sa ila nga gamit kag kwarta.
Madumduman nga sang Setyembre 15 nagpatigayon sang drug buybust operation ang Cauayan Municipal Police Station sa subject person nga si Jimmy Andrino Pinongan, 55 anyos, sang Purok 14, Barangay Talacdan, Cauayan.
Naaresto si Pinongan kag ang anum ka iban pa nga naaktohan nga nagaggamit sang illegal nga druga.
Nagdangop sa estasyon sang Bombo Radyo Bacolod ang bata ni Pinongan agud ireklamo ang gina-alegar irrigularidad sa nasambitan nga operasyon.
Sa interview sang Bombo Radyo kay Police Staff Sergeant (PSSgt.) Jero Along, arresting officer sa drug buybust operation, indi matuod ang alegasyon sang pamilya ni Pinongan bangod natigayon ang operation sa coumpound nila apang indi sa sulod sang ila balay.
Suno diri, may yara pa sang presensya sang brgy officials sa ginpatigayon nga operasyon.
Gin-alegar sang bata ni Pinongan nga ginkuha ang ila cellphone, gadgets, kwarta kag alahas, apang suno kay Along ang narekober sang kapulisan amo ang isa ka armas luthang, P4,645 cash kag mga sachet sang illegal nga druga.
