Isa ka pinasahi nga “beauty trend” ang ginapatihan nagasikat subong sa Russia matapos magwa ang report nga nagadamo ang mga lalaki nga boluntaryo nga nagapahimo sang ginatawag nga “cauliflower ear” agud mas makahaladlok ukon maisog kun tulukon.
Ang cauliflower ear, nga kilala man bilang auricular hematoma, ang isa ka permanente nga deformity sa dalunggan nga masami makita sa mga atleta sang contact kag combat sports kaangay sang boxing, mixed martial arts ukon MMA, wrestling, kag rugby.
Nagakatabo ini kun tuman ka kusog sang impact gikan sa combat attack ukon napuruhan ang dalunggan gani nagatuga sang blood clot ukon pagtipon sang fluid sa palibot sang cartilage sini.
Ginkabig ini sadto nga indi maayo nga epekto sang physical trauma, apang suno sa isa ka Russian Telegram channel, madamo nga mga lalaki ang boluntaryo na nga nagapaidalom sa procedure sini bilang simbolo sang kaisog kag pagpamahog sa iban.
Suno sa isa ka indibidwal nga nagahimo sang procedure, fully-booked gid ini sa isa ka bulan.
Nagabalor 6,000 rubles ukon kapin P3,900 ang sukot kada dalunggan.
Dugang pa, kinahanglan pa sang pila ka sesyon antes makuha ang mas “maisog” nga itsura nga daw kaangay sang beterano nga fighter ukon wrestler.
Sa pihak sini, nagapaandam ang mga eksperto batok sa nasambit nga procedure ilabi na kun ginaperform sang indi man eksperto.
Mahimo magtuga sang infection nga posible magresulta sa hematoma, hearing loss, kag paghubag sang cartilage.
Apisar sang mga pahanumdom, madamo gihapon nga kalalakinhan ang nagapadayon sa pagpaubra sang cauliflower ear bilang kabahin sang bag-o nga trend sa pagpakita sang pagka-dominante.
