BACOLOD CITY – Ginakasubo sang Catholic Bishops Conference of the Philippines (CBCP) ang ginhimo sang mga katapo sang Maute Terror Group nga pagpangguba sang mga rebulto sang mga santos kag pagsunog sang simbahan sa ciudad sang Marawi.
Nahibaluan nga nangin viral ang video kun sa diin makit-an ang armado nga mga kalalakin-an nga ginapangtumba kag ginalasak ang rebulto sang mga santos antes ginsunog ang simbahan.
Ginpahayag ni Fr. Francis Lucas sang CBCP, ang tanan nga relihiyon sa kalibutan ang nagahandum sang kalinong kag maayo nga relasyon sa tunga sang isa kag isa, lakip na ang pagrespeto sa relihiyon sang tagsa-tagsa.
Kag ang anuman nga hulag nga makaguba sa isig-kapareho, lakip na ang ila pagtuluohan, ang nagasupak sa golden rule nga nagasiling, “Do not do unto others what you would not want others to do unto you”.
Suno kay Fr. Lucas, kun nagkinagamo sadto bangud sang relihiyon, indi na dapat ini nga masulit sa karon bilang konsekwensiya sang ginhimo sang Maute nga pagpangguba sa nasambit nga simbahan.
Ginpabutyag ni Fr. Lucas nga wala dapat ginaawayan ang pagtuluohan bangud ang tagsa-tagsa ang may kaugalingon nga ginapatihan.
