Ginatskeyar sang Murcia Municipal Police Station ang mga CCTV footages sa area kun diin ginluthang ang 58 anyos nga welder sa Hacienda Siason, Barangay Caliban, Murcia, Negros Occidental, kahapon, alas-6:10 sang aga.
Ang biktima ang ginkilala nga si Alyas Crispin, 58 anyos, kasado, welder kag residente sa nasambit nga lugar.
Sa interview sang Bombo Radyo kay Police Captain Honey Labaro, hepe sang Murcia Municipal Police Station, nagalakat si Alyas Crispin padulong sa paradahan sang jeep agud magbyahe padulong sa ciudad sang Bacolod para magtrabaho sang hinali lang ini ginbangga-an sang mga suspects kag ginluthang sang makapila ka beses.
Nakaangkon sang samad ang biktima sa ulo kag nagkalainlain nga bahin sang iya lawas.
Suno kay Labaro, nagapatigayon na sila sang background checking sa biktima kag nagatipon naman sila sang CCTV footage nga mahimo nakarekord sa natabo nga pagpangluthang.
