Ginaduso sang city director sang Bacolod City Police Office nga magpasar ukon iamyendahan ang CCTV ordinance sang ciudad.
Sa interview sang Bombo Radyo Bacolod kay Police Col. Joeresty Coronica, dapat nga i-amyendahan ang CCTV ordinance agud nga mangin obligado na ang mga establishmento nga may CCTV footage nga maghatag sang kopya sa tion nga may yara na sang nabaton nga request nagikan sa mga kapulisan.
Kaangay lamang sa hot pursuit operation agud matumod kag madakpan ang suspetsado ilabi na kun ang crime scene ang may yara sang CCTV camera.
Ginasuhestyon man sang BCPO nga ilakip sa amendments ang mga lugar nga pagabutangan sang CCTV cameras kun sa diin dapat nga ibutang ini sa strategic areas para makita gid ang nagasulod sa building kag dapat may requirements kun pila ka camera ang i-install sa isa ka building depende sa kadamuon sang mga establishments.
Ang mga ini ang luyag nga isuggests sang BCPO city director sa city council paagi Councilor Pao Sy nga chairman sang Committee on Peace and Order sa Sangguniang Panlungsod.
