Padayun ang pagbantay sa mga flood prone kag storm surge nga mga lugar sa ciudad sang Bacolod apisar nga yara sa malayo nga bahin sang pungsod si Bagyo Rolly.
Suno kay Aaron Bais, pinuno sang City Disaster Risk Reduction Management Office (CDRRMO), ang command center sang ciudad nga nagapangatubang sa COVID-19 pandemic amo man ang response team nga gingamit agud nga bantayan ang mga kahalitan nga matuga sang Bagyong Rolly.
Ginpabalo naman ang mga Barangay pinaagi sa test blast nga mangin handa.
Suno kay Bais, alerto naman ang mga nagapanguna nga utilities kaangay sang elektrisidad kag tubig kag may standard operating procedure (SOP) naman ang CENECO kag BACIWA sa pagluntad sang mga bagyo.
Dugang pa sini nga nagmeeting na ang mga ini angot sa pre-disaster risk assessment angot kay Bangyong Rolly.
Apisar nga yara sa bahin sang Luzon ang bagyo kag malayo sa probinsya, nagahalong gihapon ang ciudad sang Bacolod bangod indi malikawan ang traft.
Ini ang tion kun sa diin daw kaangay nga ginabutong ang hangin nga nagalabay sa probinsya.
Ginbantayan na sang mga ini ang posibilidad sang pagbaha sa mga flood prone areas.
Sa karun medyo gamay nalang ang pag-ulan sa Bacolod indi kaangay sang Biyernes nga nalab-utan kita sang traft.
Paathag pa sini nga indi gusto ni Bacolod City Mayor Evelio “Bing” Leonardia nga lahog-lahogan ang bagyo, bangod bisan wala sang bagyo kun may thunder storm nagatuga gihapon sang pagbaha.
Ginalantaw man nga magdangat sa kategorya nga super typhoon ang bagyon rolly.
