Nakaalerto ang City Disaster Risk Reduction and Management Office sang Bacolod subong nga malain ang lakat sang panahon bangud sa low pressure area kag tropical depression nga yara sa gwa sang Philippine Area of Responsibility.
Nahibaluan nga pila ka bahin sang ciudad ang nag-eksperyensya sang pagdanaw kaina sang kaagahon apang wala sang evacuees.
Suno kay Executive Assistant to the Mayor Jomarie Vargas nga amo man ang in-charge sang disaster cluster sang Bacolod, nagpagwa ang CDRRMO sang team sang nagbunok ang ulan kagab-i apang wala sang evacuees bangud natiphag na ang pader sa Barangay Alijis nga ginahimo sang pamilya nga dingding sang ila nga balay sadto gani nagsaylo nalang sila sang ilistaran.
Dako man ang bulig sang pagclear sang Mambulok Creek duha ka semana ang nakaligad bangud maayo ang ilig sang tubig diri.
Nagabulig man ang iban nga rescue groups kaangay sang Amity, Chamber kag iban pa nga nagaupod kun may yara sang operations ang CDRRMO kaangay sang evacuation.
Suno kay Vargas, mismo ang mga barangay ang nagamonitor sa sitwasyon sa ila nga barangay.
Kun malain ang panahon suno kay Vargas, nagapatigayon sila sang text blast kag mismo ang mga barangay officials ang nagapahibalo nga handa na ang mga ini kag magapahibalo lang kun kinahanglan ang bulig sang CDRRMO.
May yara naman kuntani sang proyekto agud indi magbaha sa Carvic, Mandalagan apang nalab-utan sang election ban.
Suno sa executive assistant, kinahanglan nga palaparon ang suba bangud duha ang suba nga nagabungguanay sa Carvic gani indi makaderecho ang ilig sang tubig kag nagasaka sa highway kun madamol ang ulan.
Ang pondo para sa nasambit nga proyekto suno kay Vargas ang nagikan sa national government apang naabutan sang spending ban.
