Halos natapos na ang sanitary landfill cell no. 2 sa Barangay Felisa, Bacolod City kag posible na ini magamit sa bulan sang Enero sa masunod nga tuig.
Sa interview sang Bombo Radyo Bacolod kay Mayor Evelio “Bing” Leonardia, ginpahayag sini nga inug-endorso na lamang sa Solid Waste Management Council para sa evaluation ang sanitary landfill cell no. 2.
Kun makita sang Solid Waste Management Council nga compliant kag handa na ang sanitary landfill, posible na ini magamit sa mas madali nga panahon suno kay Leonardia.
Madumduman nga sa session sang Sangguniang Panlungsod sang Bacolod sang Lunes, gin-aprubahan ang extension sang pagdumala sang IPM Construction and Development Corporation sa sanitary landfill.
Suno kay Vice Mayor El Cid Familiaran nga pinuno sang Solid Waste Action Team (SWAT), ginpahayag sini nga gin-extend tubtob Pebrero ang management sang IPM Construction and Development Corporation agud makapreparar ang kompaniya sa bidding process kag sa bag-o nila nga scheme ukon plano sa solid waste management sa ciudad.
Nahibaluan nga matapos na kuntani ang kontrata sini sa ciudad sa Nobyembre 30.
Ang city government sang Bacolod ang nagabayad sang P9 million kada bulan sa IPM Construction and Development Corporation.
