Aminado ang General Manager sa Central Negros Electric Cooperative nga may mga illegal connections sang kuryente sa ila service area, apang paathag sini nga ang consumption ang nagasulod gihapon sa metro.
Ini kasunod sa nangin pahayag ni Negros Electric and Power Corporation President Roel Castro, nga kapin 6,000 nga mga konsumedor ang gina-alegar nagapatigayon sang illegal connections.
Sa interview sang Bombo Radyo Bacolod kay CENECO General Manager Arnel Lapore, ang mga illegal connections ang indi pagpangawat kundi illegal tappings lamang nga masami nagakatabo sa mga informal settlers.
Apang pahanumdom sini nga ang consumption ang nagasulod gihapon sa metro sang balay nga nagapahanugot sini.
Suno kay Lapore, ang polisa, ang kada balay ang dapat may isa ka metro, isa ka linya kag isa man ka supply.
Apang may iban nga mahimo indi malab-utan sang metro gani ginpili sang mga ini nga magtap sa mga pamalay nga may-ara sang kuryente.
Paathag ni Lapore nga ang kahangawa diri amo ang safety, bangod mahimo indi masarangan sang linya ang kadamuon sang connection gani mahimo makatuga sang sunog ang mga octopus lines.
Dugang pa sini nga kun kaisa, ginagamit man sang mga balay nga nagaserbe nga source sang kuryente nga pamaagi ang illegal connections, agud makaangkon sang gahom sa mga pumuluyo nga nagatap.
Nagkomiter naman ang NEPC sa pagdugang sang investment nga P240 million, kag ang problema sa illegal connections ang isa man sa ila nga luyag masolusyunan.
