Gin-ako ni CENECO General Manager Atty. Arnel Lapore nga wala sang kapasidad ang power distributor nga mag-upgrade sang mga equipment kag mag-improve sang serbisyo kun wala ini sang partner paagi sa Joint Venture Agreement.
Suno kay Lapore, pila ka tuig ang kinahanglan sang CENECO agud nga makarecover bangud dako ang utang sini subong nga nagadangat sa P800 million.
Pending pa man ang Capital Expenditure ukon CAPEX bangud wala pa sang mandu nagikan sa Energy Regulatory Commission nga nagagrant sang CAPEX kag kun magrant gid man, magautang man gihapon ang CENECO agud nga marehabilitate ang mga pasilidad.
Nakita sa karon suno kay Lapore nga nagdako ang demand sang facilities sa ciudad sang Bacolod ilabi na kun may bag-o nga subdivisions, condominiums kag malls kag wala sang kapabilidad ang CENECO nga sabton ang nasambit nga demand.
Ang masami naman nga power interruption ang tuga sang daan ukon decaying distribution lines kun sa diin nagatrip off ang supply kun matandog sang dahon sang kahoy.
Sa tion nga makasulod ang More Power, ang distribution lines ang islan sang insulated wire agud nga malikawan na ang masami nga pagtrip off sang kuryente.
Pagadal-on naman sa Bacolod ang ginahimo sang More Power sa ciudad sang Iloilo kun sa diin nagatuparay ang Office of the Building Official gani mas madasig ang pag-install sang connection sang kuryente sang bag-o nga konsumidor.
