Ginadayaw sang General Manager sang Central Negros Electric Cooperative (CENECO) ang effort sang Negros Electric and Power Corporation (NEPC) nga mabalik ang supply sang kuryente sa mga lugar nga apektado sang pagcollapse sang power transformer sang Alijis Substation.
Sa interview sang Bombo Radyo Bacolod kay Atty. Arnel Lapore, wala pa naka-engkwentro sang amo ka lala nga problema ang CENECO apang aminado ini nga sang Mayo pa lamang kun sa diin tuman ka init, ang Alijis Substation ang isa na sa ila nga ginabantayan.
Paathag sini nga sila ang dugay-dugay nga nagpatigayon sang thermal scanning bangod sa kahangawa nga magmeltdown ang power transformer bangod sa tuman nga heat index.
Kun ipaanggid sa tawo, kaangay nga wala sang nakita nga sintomas sa power transformer kag ini ang nagatrabaho lamang sang normal, sang hinali nga nag-umpisa ang oil leakage.
Panindugan ni Lapore nga ini ang wala gid na-antisipar sang parehas nga CENECO kag NEPC.
Apang paathag niya nga nagpatigayon sang preventive maintenance ang CENECO sang Pebrero 2024 bangod ini ang requirement sang Energy Regulatory Commission (ERC) kag National Electrification Administration (NEA) kag ini ang kabahin man sa ila nga tuigan nga budget.
Aminado man si Lapore nga antes paman ang transition, ginbutangan na sang tawo sang NEPC ang Alijis Substation bangod aminado sila nga tuman ka importante sang power transformer nga makabig corazon sang power distribution utility.
Agud mahatagan sang power supply ang mga apektado, gintinguhaan sang NEPC nga maconnect sa mga katupad nga Substation ang pito ka Feeders sang Alijis Substation.
Apang ang available lamang para sa Alijis Feeder 3 amo ang Murcia Substation Feeder 1 nga anom tubtob pito ka kilometros ang kalayuon.
Dugang pa ni Lapore nga gamay ang power consumption sa Murcia Feeder 1 gani may ligwa pa nga sudlan sang Alijis Feeder 3.
Paathag sini nga kun ginpilit ang paggamit sang existing 69kv line, dako ang tyansa nga ma-overload ang linya nga makatuga sang mas dako nga problema.
Bisan si Lapore ang nakibot man sa kadasig sang NEPC sa pagtakod sang anom tubtob pito ka kilometros nga linya gamit ang mataas nga kalidad sang high tension wires.
