Nagahingyo ang convenor sang Power Watch-Negros sa board of directors sang Central Negros Electric Cooperative nga ipakigbahin man sa publiko kun ano ang natabo sa senado sang sila ang nagtambong sa hearing matapos nga sila ang ginpatawag sang nakaligad nga bulan sang Abril kasunod sang natabo nga power outage sa Panay kag Negros Island kasubong man sa pila ka bahin sang Luzon.
Sa interview sang Bombo Radyo Bacolod kay Wennie Sancho, may yara sang isa ka tawo nagikan mismo sa Ceneco ang nagpahibalo sa iya nga nagtambong si Director Eugenio Velasco Jr kag Director Antonio O. Panique ang nagpadulong sa Manila agud nga magtambong sa senate hearing.
Suno kay Sancho, ang mga konsumidor ang dapat makahibalo kun ano ang natabo sa hearing nga may kaangtanan sa nagluntad nga power outage sang nagligad nga Abril 27,28 kag 29 kun sa diin ginmensyunar ni Senator Raffy Tulfo nga matapos nga nagtrip off ang linya ni Ceneco nagdis-engaged ang iban nga linya kun sa diin nagluntad ang lapnagon nga pagkadula sang connection sa kuryente.
Suno kay Sancho, deserve sang kunsumidor nga mahibaluan kun ano ang natabo sa hearing agud nga makapangaman man ang mga kunsumidor sa tion nga magluntad liwat ang kaangay nga brownout.
Suno diri, kun padayon nga magpabungol ang mga directors nga nagtambong sa hearing, daw kaangay lang nga mas ginapadali nila ang joint venture agreement agud nga masolusyunan ang mga problema sang electric cooperative.
Samtang, kumporme naman ini nga pasakaan sang kaso sang alkalde ang CENECO bangud sang pagluntad sang power outages nga nagtuga sang pagkaguba sang mga appliances sang mga Bacolodnon.
Suno diri mas maayo nga ginpangunahan na mismo sang alkalde sang Bacolod bangud madamo naman sang nagub-an sang appliances apang wala lang nagahambal.
