Ginakonsiderar sang Central Negros Electric Cooperative (CENECO) ang pagfile sang motion for reconsideration tuhoy sa desisyon nga ginpagwa sang Department of Labor and Employment (DOLE) nga ihatag na ang Collective Bargaining Agreement (CBA) sa Ceneco Union of Rational Employees (CURE).
Ini matapos nagpagwa sang order si DOLE Secretary Silvestre Bello III nga nagamando sa CENECO nga ihatag na ang kaundan sang CBA sa employees union.
Suno kay Atty. Leonie Vee Apuhin, regulations compliance officer sang CENECO, ila ginakonsiderar ang pagfile sang motion for reconsideration, nga ila sarang mahimo napulo ka adlaw pagkatapos nagpagwa sang desisyon ang Labor secretary.
Gin-athag ni Apuhin nga ang mando sang DOLE ang indi pa final kag executory bangud may yara pa sila sang available nga remedy kag ini amu ang magfile sang motion for reconsideration.
Ang ginapangayo sang CURE amu ang P15,000 nga signing bonus sang mga miyembro sang union, 2.5 percent nga pagsaka sa ila sweldo kada tuig humalin 2021 kag allowances.
Sang tinalikdan nga Enero, nagboto ang mga miyembro sang union nga sila ang magapatigayon sang pito ka adlaw nga strike apang wala ini natigayon.
Una naman nga ginpahayag sang Board of Directors sang CENECO nga santo sa gintalana sang National Electrification Administration, dapat nga malab-ot sang CENECO ang 95 percent collection efficiency agud nga mahatag ang kaundan sang CBA.
Suno sa BOD, ang kasugtanan nga ginpirmahan sang Nobyembre 29 ang commitment na sang CENECO nga tumanon ang provision sang CBA kun malab-ot ang requirement sa collection efficiency apang indi matumod ang petsa bangud indi man mapaktan kun san-o makakolekta sang 95 percent sang balayran sang mga member-consumers.
