Magasandig ang Central Negros Electric Cooperative sa desisyon sang National Electrification Administration kun madugangan ang inadlaw sang plebisito para sa joint venture agreement sa tunga sang CENECO kag More Power.
Nahibaluan nga gincancel ang plebisito sang Hulyo 1 kag 2 bangud sa temporary restraining order sang korte sang Hwebes nga ginlift man sang Biyernes.
Suno kay acting CENECO general manager Atty. Arnel Lapore, nagahulat sila sang abiso sang NEA angot sa petsa sang plebisito bangud ang nabilin sa karon amo ang July 8 kag 9 kag wala nasakop sang una nga temporary restraining order sang RTC Branch 42.
Apang kun maghatag sang abiso ang NEA nga dugangan ang inadlaw sang plebisito ukon isuspend, ini ang pagasundon sang CENECO.
Kun indi naman madugangan ang inadlaw, nagapati si Lapore nga mabudlay kun Hulyo 8 kag 9 nalang ang plebisito bangud may threshold nga dapat lab-uton kag indi lamang pag-ibase sa majority sang boto, pati ang Hunyo 24 kag 25.
Nahibaluan nga dapat 50 porsyento sang member-consumers ang dapat nga makaboto sa plebisito.
Nakabaton naman sila sang report nga may mga konsumidor nga napatay na nga yara pa sa masterlist gani makaapekto ini sa numero sang mga buhi nga nakaboto.
Suno kay Lapore, napahibalo na ini sa NEA kag ginahulat sa karon ang ila advice kun ano ang maayo himuon.
Sa tion nga indi makaboto ang 50 porsyento sang member-consumers, indi madayon ang JVA kag magabalik ang CENECO sa solo nga pagdumala sang power utility.
Bangud sini, padayon ang pag-engganyo ni Lapore sa nga wala pa nakaboto nga makigbahin sa plebisito kag kun indi available, sarang ini makapadala sang proxy.
