Nag-anunsyar sang 30-day grace period ang Central Negros Electric Cooperative Inc. para sa mga member consumer owner (MCO) nga apektado sang ginpaidalum sa modified enhanced community quarantine (MECQ) ang Bacolod City.
Madumduman nga nagsugod ang implementasyon sang MECQ sadtong Setyembre 8 kag nagtakop sang Setyembre 30.
Suno kay Ruel Venus, head sang Member Consumer Division sang CENECO, pahanugutan naman nga mag-extend sang isa ka bulan ang mga electric bill sa amo nga period kag indi paga-utdan sang kuyente.
Sa idalum sang Bayanihan to Recover as One Act ukon Bayanihan 2, may direktiba nga ang tanan nga mga lugar nga yara sa idalum sang hugot nga quarantine measures, kaangay sang MECQ ang hatagan sang isa ka bulan nga grace period sa mga kaangay sang electric, water, telecommunications kag iban pa nga mga utilities.
Apang indi na ini aplikable sa mga petsa nga indi na kabahin sa MECQ.
Samtang sarang naman nga mabayaran ini sang amat-amat sa sulod sang tatlo ka bulan nga installment scheme nga wala sang interest, penalties ukon dugang nga balayran.
Ginpaathag naman ni Venus nga aplikable lang ini sa mga kunsumedor sa ciudad sang Bacolod bangod ini lang ang nagpaidalum sa MECQ.
Samtang sarang gihapon nga pagabatunon kag ginarekomendar ang pagbayad sang full payment.
Sarang naman nga makabayad ang mga konsumidor sa CENECO Main kag mga sub-offices.
Kasubong man nga makabayad sa Robinsons Collection Center, Alvio Collection Center, SM Collecting Banks ukon online payments.
Ini ang para sa tanan nga sakop sang CENECO kaangay sang Bacolod City, Talisay City, Bago City kag ang banwa sang Murcia kag Don Salvador Benedicto.
