Ginpanginwala sang Central Negros Electric Cooperative ang alegasyon nga may lamud-pamulitika ang pagpasaka sang kaso administratibo batok kay Punong Barangay Rosinie Distrito, barangay treasurer kag barangay secretary sang Singcang Airport bangud sa pagpangawat sang kuryente para sa barangay hall.
Suno kay Ma. Luisa Parroco, pinuno sang Coop Promotions Section sang CENECO, natabuan lang nga campaign period ang pagfile sang kaso batok kanday Distrito sa Office of the Ombudsman for the Visayas.
Suno diri, natabuan man nga nagapadalagan sa 2022 elections ang utod kag iloy ni Distrito gani nagtuhaw ang alegasyon nga naangot ini sa pulitika.
Panindugan ni Parroco, nagapadayon ang pagpursige sang CENECO agud nga mapasakaan sang criminal case nga violation sang Anti-Pilferage Act of 1994 ang mga nagajumper ukon nagapangawat sang kuryente.
Suno kay Parroco, ginhatagan ang barangay officials sang Singcang sang tsansa nga isettle ang balayran apang wala sang effort sa ila bahin gani wala gid ini nabayaran tubtub subong.
Nagpanawagan man si Parroco sa mga konsumidor nga ireport gilayon sa ila kun may nahibaluan nga may nagapangawat sang kuryente bangud konsumidor man gihapon ang nagabayad sini bangud nagakadto sa system loss.
Sa idalom sang pagsulundan, 11 percent lang ang maximum nga tulungaon sang mga konsumidor sa system loss kag ang sobra dira ang ginabayaran sang CENECO nga sarang pa kuntani magamit sa maintenance kag improvement sang facilities.
