(update) BACOLOD CITY– Ginkumpirmar sang Central Negros Electric Cooperative (CENECO) nga hatagan nila sang bulig-pinasyal ang pamilya sang napatay bangud nga nakasalawid sa nagaluyloy nga kuryente sang natumba nga sementado nga poste sa ciudad sang Bago, tinalikdan nga Sabado sang gab-i.
Suno kay Roy Cordova, presidente sang CENECO, akuon sang electric cooperative ang gasto sa pagpalubong kay Roger Campos, 52-anyos sang Brgy. Don George L. Araneta sang nasambit nga ciudad.
Dugang pa sini nga iya gid nga iduso sa patigayunon nga board meeting subong nga adlaw nga mahatagan sang scholarship ang mga nabilin nga kabataan ni Campos nga naga-eskwela pa.
Madumduman nga may lima ka mga kabataan ang biktima kun sa diin tatlo sa mga ini ang nagaeskwela pa kag nagapang-edaran sang 3 ka tuig ang iya agot.
