Nagpanawagan ang pinuno sang Community Environment and Natural Resources Office – Bago City sa mga kandidato nga hambalan ang ila mga supporters nga ind pag-ilansang sa puno sang kahoy ang ila nga campaign materials.
Sa interview sang Bombo Radyo kay Joan Nathaniel Gerangaya, nagapadayon na ang pagbaklas sang campaign materials nga ginlansang sa mga puno sang kahoy sa sulod sang Northern Negros Natural Park samtang magapakig-angot naman sila sa Department of Public Works and Highways para sa mga ginlansang sa kahoy nga yara sa higad sang national highway.
Suno kay Gerangaya, sunlight kag tubig ang kinahanglan sang kahoy kag indi lansang.
Suno sa DENR official, may kinamatarong ang mga kahoy nga mabuhi gani indi sila dapat paglansangan ilabi pa nga wala man sila nagaboto gani dapat ini nga respetuhon sang mga kandidato.
Sa karon suno kay Gerangaya, indi pa tuman kadamo ang ginbaklas nga campaign materials sa sulod ang NNNP apang ginalauman nga magadamo ang violators kun magsugod na ang campaign period para sa local candidates.
Nagalaom naman si Gerangaya nga ang kandidato mismo ang magahatag sang instruction sa iya supporters nga indi pag-ilansang sa kahoy ang posters.
Suno sa CENRO head, ini na ang tion agud icriticize ang mga kandidato nga yara sa posters sa kahoy kag indi sila pagbotohon sa eleksyon.
