Ginmanduan sang Energy Regulatory Commission ang Central Negros Electric Cooperative nga bayaran ang overcharged rates sa mga member-consumers.
Sa Notice of Resolution nga gin-issue sa Central Negros Electric Cooperative, Inc. (CENECO), Pangasinan I Electric Cooperative, Inc. (PANELCO I) kag La Union Electric Company, Inc. (LUECO), ginmanduan sang Energy Regulatory Commission (ERC) ang concerned distribution utilities nga irefund ang total over-recoveries nga gincharge sa mga customers.
Nagmandu ang ERC sa CENECO nga ipatuman ang refund sang total net over-recoveries nga nagadangat sa masobra P237.9 million.
Ang total over-recoveries ang natabo halin February 2004 tubtub December 2017.
Ginmanduan man ang distribution utilities nga magsumiter sang monthly report nga nagapakita sang ila narefund tubtub nga maimpas ang kabug-usan nga balor.
Suno kay Engr. Norman Pollentes, corporate planning manager sang CENECO, sundon nila ang mandu sang CENECO kun sa diin P11 million ang igarefund sa mga konsumidor kada bulan.
Apang magahingyo ang mga ini sang conference sa ERC officials agud madiskusyunan kun ano ang nagtrigger sang variance kag nag-overcharge ang CENECO.
Suno kay Pollentes, mahibaluan ang variance sa masunod nga binulan apang samtang wala pa ini nahitso, pagasundon sang CENECO ang mandu sang ERC.
Sa karon, nagadangat sa 213, 950 ang mga household nga member consumers sang power distributor nga maka-avail sang refund.
