Nagdepensa ang Central Negros Electric Cooperative kasunod sang reklamo sang nasunugan sa San Mateo Village, Barangay Banago, ciudad sang Bacolod kahapon nga madugay na nila ginreklamo sa CENECO ang nagapatay-patay nga linya sang kuryente apang kadugay sang pagresponde tubtub nga nagluntad ang sunog.
Sa interview sang Bombo Radyo kay Unice Pasaylo-Castillon, chief sang Member-Consumer Integrated Services Division sang CENECO, aware ang technical division nga may reklamo ang nasunugan sang Pebrero 22 kag gilayon ini nga ginrespondehan kag natapos man gilayon sa pareho nga adlaw.
Sa pag-usisa, naga-on-and-off ang power kag diri natukiban nga corroded ukon may tuktok ang meter socket sa pole gani gin-islan ini kag gincorrect ang complaint.
Suno kay Castillon, tsekyaron nila kun may dugang nga complaint ang nasunugan.
Nagpanindugan man si Castillon nga ginalista sang hotline operator ang mga reklamo kag ginaforward sa technical kag ginatapos gilayon ang pagtroubleshoot.
Suno diri, ginauna sang technical section ang dapat nga unahon.
Pagahulaton naman ang resulta sang imbestigasyon sang Bureau of Fire Protection bangud nagatrabaho ang CENECO sa gwa sang balay kag wala ginatakdan sang linya kun sala ang service entrance.
Ang nagapatakod naman sang kuryente ang dapat nga may competent nga master electrician nga amo ang magainstall sang wirings sa sulod sang balay nga tsekyaron sang Office of the Building Official.
