Wala napunggan sang chief executive officer kag presidente sang Yanson Group of Bus Companies nga magtulo ang luha kadungan sang iya pag-atubang sa mga katapo sang media matapos ila nabawi ang tanan nga mga opisina kag terminal sang Vallacar Transit Incorporated nagikan sa apat ka mga utod.
Nahibaluan nga ang main office sa Barangay Mansilingan ang ulihi nga narekober sang Yanson matriarch nga si Olivia Villaflores Yanson kag agot nga si Leo Rey nagikan sa mga terminal kag opisina sang Ceres.
Sa press conference nga ginpatigayon sa main office kaina sang aga, nag-atubang sa media sanday OVY, LRY kag utod nga si Ginnette Yanson-Dumancas.
Emosyonal si LRY samtang nagapasalamat nga narekober nila ang mga opisina sang VTI.
Ginpasalamatan sini ang mga empleyado sa pagpalangga sa iya kag pagsakripisyo nga amo ang iya motibasyon agud padayunon ang pagpakigbato sa tunga-tunga sang gumuntang.
Daw halos indi makahambal sang tayuyon si Leo Rey bangud nagtulo ang luha sini samtang nagapasalamat sa iya iloy nga si OVY.
Suno kay LRY, nahibaluan niya ang kabudlay sang iya nga iloy bangud tigulang na ini.
Ginbalikan man sang CEO kag presidente ang kabudlayan nga gin-agyan sang iya iloy kag amay nga si Ricardo Yanson Sr. agud lamang mapadako ang ila negosyo.
Suno sa agot nga anak, gintudluan siya sang iya mga ginikanan nga pamilya man nila ang mga empleyado.
Nagpasalamat man ini sa iya magulang nga si Ginnette kag sa ila abugado nga si Atty. Norman Golez.
