Madinalag-on nga napatigayon ang ceremonial distribution sang 10 kilos nga bugas sa mga kapin dos mil nga senior citizen nga edad 65 anyos pasaka nga wala sang social pension sa ciudad sang Bacolod.
Ini ang 2nd tranche na sang rice distribution program sa idalom sang Bawat Bayan Makikinabang program nga ginhingadlan nga Mula sa Puso para sa Pamilya program.
Ang aktibidad ang ginpatigayon sa STI-West Negros University kag ginpangunahan ni First Lady Liza Araneta Marcos.
Sa interview sang Bombo Radyo Bacolod kay Bacolod City Mayor Greg Gasataya, kapin 2,000 ang ginhatagan para sa ceremonial distribution, samtang nagrelease naman sila sang bugas sa mga kalapit nga Barangay.
Suno sa alkalde yara sa kapin 35,000 ang mga benepisyaryo.
Maga-anunsyar na lamang sila kun san-o ang distribution sa iban nga mga Barangay.
Pahayag ni Mayor Greg nga apat ka tranche ang rice distribution, nga nasuguran sang Hulyo, subong nga Agosto para sa 2nd tranche, samtang ang 3rd kag 4th tranche ang patigayunon naman sa Oktubre kag Nobyembre.
Ang nauna nga listahan ang gintinluan naman kag ginpalos ang doble kaangay sang mag-asawa, kasubong man ang mga nagtaliwan na.
Ginpahanugutan naman ang mga benepisyaryo nga magdala sang guardian kaangay sang bata kag apo, agud may makabitbit sang 10 ka kilo nga bugas.
Locally-milled rice naman ang ginpanghatag bilang suporta sa local farmers.
Ginkumpirmar naman sang pila ka benepisyaryo nga maayo ang kalidad sang bugas, kag wala sang baho nga mahimo makalukmat sang balatian. Samtang
Ginkalipay sang 71 anyos nga senior citizen ang pagbatun sang 10 ka kilo nga bugas sa idalom sang Mula sa Puso para sa Pamilya program nga ginpangunahan ni First Lady Liza Araneta Marcos.
Ang ceremonial distribution sa kapin 2,000 nga senior citizen nga edad 65 pasaka ang ginpatigayon sa covered court sang STI-West Negros University kaina sang aga.
Sa interview sang Bombo Radyo Bacolod kay Amalia Leonardia, residente sa Brgy Taculing, Bacolod City, siya ang nakakuha sang numero sa linya nga 1,078.
Pahayag sini nga sang aga lamang siya napahibalo nga siya ang isa sa magabatun.
Wala naman ini sang iban nga nakaupod gani siya ang nag-arkila na lamang sang trisikad agud mapauli ang nabatun nga bugas.
Pahayag sini nga sa una nga tranche ang iya nga bana amo ang nakakuha, samtang sa 2nd tranche siya naman ang nahatagan.
Ang mag-asawa ang wala sang pension, gani nagapasalamat ini nga sila ang wala ginkalimtan sang gobyerno.
