Gin-umpisahan na ang ceremonial painting para sa Longest Mural Wall sa Mabini Street, Bacolod City may kaangtanan sa selebrasyon sang Masskara Festival 2024.
Sa interview sang Bombo Radyo Bacolod kay Project Orange Admin Cindy Nagrampa, ang proyekto ang ginakabig nga pinakamalaba nga mural wall sa Bacolod City nga nagadangat sa 150 meters ukon 450 feet.
Kabahin sa proyekto ang 40 ka mga local artist kag 10 ka volunteers ukon mga estudyante gikan sa art department.
Ang pader ang kabahin man sa maragtas sang ciudad bangod diri una ginpirmahan ang charter day sang Bacolod City.
Bilang kabahin sa Masskara colours of Bacolod, nafeature sa mural paintings ang sugar farmers, workers kag iban pa nga nagarepresentar sa City of Smile.
Nahighlight man sa mural painting ang past, present kag future sang Bacolod City.
Pinaagi sa tikang, mahatagan sang tyansa ang mga local painters nga makabahin sa selebrasyon sang Masskara Festival kasubong man ma-islan sang art ang public spaces sa baylo nga mapuno sang vandals.
Sa pihak sini, may mga canopy man nga gintukod agud may mapasilungan ang mga artists sa tuman nga init.
Ang pagpinta sa Longest Mural Wall ang nag-umpisa kaina sang aga kag ginabanta nga matapos sa Oktubre 13.
Samtang mismo mga artists ang nagconceptualize sang Bacolod Masskara Festival gani nagakadapat lamang nga sila ang mahatagan sang platform.
Sa interview sang Bombo Radyo kay Bacolod Yuhum Foundation Board Member Rodney Escalon, nagakaigo na nga tion agud mabalik ang ila creative spirit.
Sang umpisa, ginpinsar sini nga gamay lamang ang proyekto apang sang gin-imbetar ang Orange Project, nakita nila ang ginabubo nga dedikasyon kag passion sang mga artists pinaagi sa Longest Mural Wall.
Bangod sini sila sa Bacolod Yuhum Foundation ang bukas naman nga maghatag sang suporta, kwarta kag oras agud matigayon ang event.
