Nagpasalig ang Vallacar Transit Inc. (VTI) sa mga pasahero nga wala sang pagsaka sa plete apisar padayon ang pasaka sang presyo sang produktong petrolyo.
Sa interview sang Bombo Radyo Bacolod kay Media and Legal Affairs Manager sang Vallacar Transit Inc. (VTI) nga si Jade Marquez, ginpaathag sini nga sa karon wala pa sang pagtaas sang plete sa ila mga biyahe bisan nagasaka ang presyo sang gasolina.
Ginapahanumdom man sang VTI sa publiko nga kun may mabatian ukon may maeksperyensyahan nga pagsaka sang plete, importante nga i-report gilayon kag sila ang maga-monitor man kun insakto ang presyo sa ticket nga ginahatag sang konduktor.
Dugang pa diri, kun may opisyal gid nga pagsaka sang plete sa palaabuton, ipahibalo man gilayon nila sa mga konsumidor agud indi makibot sa bag-o nga pamasahe.
Sa karon, ginpasalig sang kumpanya nga wala pa sang ginpatuman nga pagsaka sa plete bangud wala pa man sang petition nga napasar sa Land Transportation Franchising & Regulatory Board (LTFRB).
Dugang pa diri, indi sila pwede makapasaka sang plete samtang wala pa sang ginpagwa nga bag-o nga fare matrix ang ahensya.
