Ginkumpirmar sang public relations officer sang Vallacar Transit Inc. nga indi makigbahin ang mga Ceres buses sa transport strike ukon untat byahe sa Marso 21 kag Marso 22.
Sa interview sang Bombo Radyo kay Jade Seballos, ginpahayag sini nga indi makigbahin ang mga miyembro sang Provincial Buses Association of the Philippines sa transport strike bangud nakit-an man nila ang epekto sini.
Suno kay Seballos, madamo sang mga pasaheor nga luyag magbyahe.
Aminado ini nga posible maapektuhan ang kadamuon sang mga pasahero sa masunod nga Lunes kag Martes apang yara lamang ang ila mga units magahulat sa mga terminal.
Gindugang man sini nga indi man sila basta-basta makauntat byahe bangud batok ini sa polisa sang Land Transportation Franchising and Regulatory Board (LTFRB).
Ginaistoryahan naman sang ila management ang pagpasaka sa plete bangud kinahanglan nga isa ang ila panindugan sang Provincial Buses Association of the Philippines.
Kun mahisugtan nga magpasaka sang plete, ila ini ipadangat sang LTFRB agud makapagwa sang anunsyo.
Aminado si Seballos nga indi pa fully operational ang ila mga units bangud limitado lamang ang nagabyahe apang ginahimo nila ang tanan agud makaserbisyo sa riding public.
