BACOLOD CITY – Liwat nga ginpakahuy-an sang Ceres-Negros Football Club ang pangayaw nga Tampines Rovers sang Singapore sa liwat nga pag-atubangay sang mga ini sa second round sang Group G qualifier sang 2017 Asian Football Confederation (AFC) Cup sa Panaad Park and Stadium sa ciudad sang Bacolod kagab-i.
Sa pihak sang madanlog nga football field bangud sa pag-ulan, todo depensa ang Ceres FC kag naangkon sini ang back-to-back victory sa score nga 5-0.
Naghugyaw ang mga footballs fans matapos maka-score ang Ceres sa una nga duha ka minuto sang hampang matapos maka-goal ang No. 11 player nga si Ian Ramsay.
Gilayun nga nangin 2-0 ang score matapos nga nasundan pa antes ang half-hour sang match sang maka-goal si Bienvenido Marañon; kag liwat naman nga naka-goal sa ika-37 nga minuto si Manuel Ott.
Nadugangan pa ini sang duha ka goals sa second half sang hampang matapos nakapasulod si Marañon kag Fernando Rodriguez.
Wala nagpalingkang sa pagtupa sang ulan ang linibo ka mga football fans nga naghatag sang suporta sa Ceres Negros FC pinaagi sa pagsuksok sang yellow nga amo ang official color sang Negros-based football club.
Lubos naman ang pagdayaw sang head coach sang Ceres FC nga si Risto Vidakovic sa kadalag-an sang football team.
Kaupod sang Tampines kag Ceres Negros sa Group G ang Felda United sang Malaysia kag Ha Noi Football Club sang Vietnam.
Sa opening round duha na ka semana ang nakaligad, one-all draw ang Ceres batok sa Ha Noi samtang gingamit naman sang Tampines ang homecourt advantage sini batok sa Felda sang Malaysia sa Jalan Besar Stadium sa Singapore.
