BACOLOD CITY – Nagalaom ang head coach sang Ceres-Negros FC nga 100 porciento ang igahatag sang mga players sa pag-atubang sini sa Felda United sang Malaysia diri sa ciudad sang Bacolod karun sa gab-i.
Sa interview sang Bombo Radyo kay Coach Risto Vidakovic Savic, indi sila maghatag sang kumpyansa bangud mabakod nga team ang Felda United.
Nakita suno sa iya sang Busmen ang depensa sang Malaysian team sang gin-atubang sini ang Hanoi Football Club sang Vietnam sang nagligad nga semana kun sa diin patas ang hampang.
Nahibaluan nga 1-all draw man ang Ceres batok sa Hanoi antes gin-atubang sang Vietnam football team ang Felda.
Aminado si Savic nga kinahanglan nila nga preparahan ang depensa sang Fighters bangud lain man suno sa iya ang istilo sini sa paghampang kun ikumparar sa Tampines Rovers sang Singapore nga ginlampaso sang Ceres sang Marso 7 sa Panaad Park and Stadium sa score nga 5-0.
Wala sang dako nga expectation ang head coach sa iya mga players bangud bilog ang bola apang nagalaom ini nga mangin positibo ang resulta sa sulod sang 90 minutos nga hampang.
Matapos ang match sang Ceres batok sa Felda subong nga adlaw, may tatlo pa ini ka iban pa nga matches sa Group G qualifier sang 2017 AFC Cup.
