Nakabawi na ang Ceres Negros Football Club sa ila duha ka magkasunod nga kalutusan matapos wala ginpaporma ang Davao Aguilas FC sa showdown kagab-i sa nagapadayon nga Philippine Football League (PFL) 2018.
Wala nagdulot ang kuko sang mga Aguilas sa match sa Panaad Park and Stadium sa Brgy. Mansilingan, ciudad sang Bacolod nga nagsugod las-7:00 kagab-i sang natapos ini sa 3-0 pabor sa Busmen.
Una nga naka-goal ang Ceres pila ka minutos antes matapos ang first half pinaagi sa free kick ni OJ Porteria matapos na-foul ang isa ka player sang kasumpong.
Nagdugang sang duha pa ka goals si Bienvenido Marañon sa second half samtang wala gid nakabalos ang Aguilas.
Wala man nakapakitang-gilas ang mag utod nga Phil kag James Younghusband para sa Davao Aguilas.
Una na ginpahayag ni Warren Concepcion, tournament administrator sang Ceres Negros FC nga kinahanglan nila nga magbawi sa kalutusan sang dalmlang sa Kaya FC Iloilo para sa PFL 2018 kag sa Yangon United sa AFC Cup 2018.
