Ginpahayag sang chairman sang committee on transportation nga halos indi mabatyagan ang kilos protesta nga ginpatigayon sang mga Jeepney operators kag drivers sa ciudad sang Bacolod.
Sa interview sang Bombo Radyo kay Councilor Al Victor Espino, bisan sin-o may deretso sa paghiwat sang kilos protesta sa luyag nga magpabutyag sang ila sentimento sa gobyerno.
Suno diri, naka-atubang na ini sa mga traditional jeepney operators kag drivers kag napalab-ot naman sini ang programa ni Bacolod City Mayor Alfredo Albee Benitez nga paglunsyar sang isa ka kooperatiba para sa mga traditional jeepney operators kag drivers nga makapakigbahin sa modernization program.
Pahayag ni Espino, ang modernized program isa ka progreso nga programa para sa mga traditional jeepney operators kag drivers amo nga ginhatagan sini sang pagtamod nga yara na sa lebel nga mahatagan sang matuod-tuod nga solusyon nga makasustinir sa pangabuhian sang mga dryaber kag operators sang traditional jeepney.
Pagpa-athag ni Espino, tuig 2017 pa sang ginlunsyar ang modernization program amo nga malawig ang tion nga nahatag para makacomply ang mga drivers kag operators.
Ginpahayag man sini nga napalab-ot na kay Department of Transportation Secretary Jamie Bautista ang sentimento sang transport group sa ciudad sang Bacolod.
