Nagpanawagan ang chairman sang committee on agriculture sa Sangguniang Panlungsod sang Bacolod sa mga konsumidor sang baboy nga mag-ulualigmat sa pagbakal sang karne sa posibilidad nga may yara sang nagabaligya sang mga patay nga baboy nga ginhingagaw ihaw.
Suno kay Councilor Thaddy Sayson, sa deklarasyon nga may yara na sang kaso sang ASF sa siyudad sang Bacolod, mas pagahugtan pa sa karun ang monitoring sa siyudad.
Suno diri, sa siyudad may yara sang duha ka barangay nga ginkuhaan sang sample agud ipaidalum sa testing ang mga baboy; ini ang ginalakipan sang Barangay Taculing kag Barangay Handumanan.
May yara sang duha ka baboy nga nagpostibo sa ASF sa Barangay Taculing samtang negatibo naman ang sa Barangay Handumanan.
Pahayag ni Sayson, mas ginahatagan sang madalom nga atensyon ang problema sa ASF kun ikumpara sa hog cholera bangud may yara sang available nga bulong para sa hog cholera.
Nagpanugyan ini sa City Veterinary Office nga pasanyugon pa gid ang trabaho ilabi na sa kahangawa nga may yara sang mga ginabaligya nga mga baboy sa merkado nga double dead.
Gintawag man sini ang atensyon sang mga punong baranagy nga tsekyaron ang ila nga area kag gilayon nga ireport kun may yara sang baboy nga naglain ang pamatyag ukon napatay.
Nagpanawagan man ini sa mga konsumidor nga mag-ulu-aligmat sa pagbakal sang baboy sa merkado sa posibilidad nga ini ang double dead.
