Nagalaom ang chairman sang committee on energy sa Sangguniang Panlungsod nga mas magadamo ang makigbahin sa plebisito angot sa Joint Venture Agreement sa tunga sang Central Negros Electric Cooperative kag PrimElectric sa karon nga natapos na ang cleansing sang masterlist.
Suno kay City Councilor Kalaw Puentevella, nagpanawagan ini sa mga member-consumers nga iexercise ang kinamatarong nga magboto.
Nagalaom man ini nga mangin matawhay ang binotohay kun magresume na ang plebisito, depende sa go signal nga igahatag sang National Electrification Administration.
Suno kay Puentevella, mas maayo gid nga nalimpyuhan na ang masterlist bangud may pila ka mga problema nga nasugata sa una nga inadlaw sang plebisito antes ang review sa listahan agud nga ang matuod gid nga miyembro ang makaboto.
Subong nga nalimpyuhan na ang masterlist, mas maathagan na ang tanan suno sa iya kun sanday sin-o gid man ang nagakadapat nga magboto.
Kun makaboto ang member-consumer suno sa iya, patimaan ini nga kwalipikado ini bangud yara ang iya ngalan sa final masterlist.
