Gin-agda sang chairman sang Committee on Health sa Sangguniang Panlungsod sa ciudad sang Bacolod ang tanan nga updan ang “Dugong Bombo: a little pain, a life to gain” blood letting activity sang Bombo Radyo kag Star FM nga patigayunon sa November 18 sa City Mall Mandalagan, Bacolod City.
Sa interview sang Bombo Radyo Bacolod kay Councilor Claudio Jesus “Kalaw” Puentevella, nagapanginbulahan ini sa pamunuan sang Bombo Radyo nga halin sang-una tubtob sa karun, nagapatigayon sang blood letting project kaupod ang Philippine Red Cross.
Suno kay Puentevella, maabot gid ang punto sa kabuhi sang tawo nga magakinahanglan sang dugo kag bisan ano pa kadamo ang manggad kun wala sang kuhaan sang supply, dako gid ini nga problema.
Bangud sini, ginaengganyo niya ang tanan nga mga pumuluyo sa ciudad sang Bacolod nga updan ang programa sang Bombo Radyo agud nga sa tion nga kinahanglan na, may yara sang makuhaan sini.
Samtang, nagpadala na sang instruction ang national commander sang Task Force Kasanag International sa mga miyembro kag volunteers sang ila organisasyon nga suportahan ang “Dugong Bombo: a little pain, a life to gain” blood letting activity sang Bombo Radyo kag Star FM nga patigayunon sa November 18 sa City Mall Mandalagan, Bacolod City.
Sa interview sang Bombo Radyo Bacolod kay Dr. John Chiong, ginkumpirmar sini nga nakapadala na sang instruction sa ila opisina sa ciudad sang Bacolod para sa mga volunteers kag miyembro nga updan ang blood letting activity sang Bombo Radyo kag Star FM.
Suno kay Chiong, gina-engganyo man sini ang mga miyembro kag volunteers sang ila nga organisasyon nga may estasyon sang Bombo Radyo kun sa diin nahamtang ang mga opisina sa bahin sang pungsod nga mag-upod man sa programa.
