Nagpanawagan ang chairman sang Committee On Health & Sanitation sa Sangguniang Panlungsod nga proteksyunan ang kaugalingon bangud sa tuman kainit nga panahon subong nga summer season.
Sa interview sang Bombo Radyo Bacolod kay Councilor Claudio Jesus Raymundo “Kalaw” A. Puentevella, subong nga panahon nga tuman ang kainit sang panahon dapat maginum sang madamo nga tubig kag magbutang sang protection sa lawas kaangay sang payong ukon kalo sa tion nga maggwa.
Nagpanugyan man ini sa mga ginikanan nga ipalikaw ang mga kabataan sa paghampang sagwa agud malikawan nga makakuha sang mga balatian nga tuga sang tuman kainit nga panahon.
Suno kay Puentevella, magluwas sa indi paghampang sang mga kabataan sagwa bangud sa tuman kainit, dapat man nga siguruhon nga malimpyo ang pagkaon nga ginabakal sang mga kabataan.
Nagpanawagan man ini sa nagabaligya sang mga pagkaon nga dapat siguruhon man nga malimpyo ang mga pagkaon nga ginabaligya agud nga malikawan ang mga balatian nga tuga sang indi maayo nga pagpreparar sa pagkaon nga ginabaligya.
Suno kay Puentevella, dapat tandaan nga prevention is much better than cure.
