Ginalantaw sang chairman sang committee on police matters sa Sangguniang Panlungsod sang Bacolod nga implikasyon sang drug war ang serye sang pagpamatay sa ciudad kun sa diin nagaangkasanay sa motorsiklo ukon pribado nga salakyan ang mga suspetsado.
Sa interview sang Bombo Radyo kay City Councilor Al Victor Espino, aminado ini nga may mga pumuluyo nga nagakabig sa ciudad bilang murder capital sang Western Visayas.
Kalabanan nga mga biktima suno sa konsehal ang naga-engage sa illegal drug activities apang nagakatabo man ini sa iban nga bahin sang rehiyon gani indi patas ang nasambit nga bansag.
Ginakasubo ni Espino ang nagakatabo apang ini ang reyalidad sang sitwasyon.
Ginalantaw ini sang opisyal nga implikasyon ini sang drug war apang dapat ini nga solbaron sang PNP bangud krimen ang pagpatay sang tawo.
Suno diri, wala sang masabat ang mga local officials kun sin-o ang may kahimuan sa nagakatabo gani ginatugyan na sa Bacolod City Police Office ang pagsolbar sini, bangud bisan malain ang isa ka tawo, ginapresume ini nga inosente tubtub mapamatud-an nga guilty.
Ginpamilit man sang konsehal nga wala nagkulang ang Bacolod City government sa pagbulig sa BCPO.
Sang damlag lang suno sa iya, nagrelease ang city government sang P2 million nga fuel subsidy kag ginalobby pa nga ini ang madugangan.
Nagpain naman ang ciudad sang P15 million nga pondo agud nga ibakal sang patrol cars nga ipanagtag sa mga police stations sa ciudad.
