Nahisayran sa pagtililipon nanday Councilor Cindy Rojas, chairman sang Committee on Returning Residents kag iban pa nga opisyal sang syudad nga ang tanan nga mga Locally Stranded Individuals nga magapauli sa syudad nga naghalin sa infected nga lugar sa Pilipinas ang gilayon dal-on sa Graciano Lopez Jaena Elementary School para makuhaan sang swab sample.
Ini ang para man sa profiling antes pa iendorso sa Barangay kag Barangay Health Emergency and Response Team (BHERTs).
Suno kay Rojas, ang tanan nga nagikan sa Cebu ang indi pa makatabok matapos magpagwa sang memorandum ang Department of the Interior and Local Government (DILG) nga wala sang makagwa nga tawo sa Cebu City bangud sa nagapadayon nga pagtaas sang kaso sang Covid-19 sa nasambit nga ciudad.
Ginpahayag man sini nga ang tanan nga magikan sa Panay ang indi na kinahanglan nga magpaidalom sa swab magluwas na lamang sa nagapakita sang sintomas.
Ginkompirmar man sini nga linibo naman ang nakapauli sa ciudad nga mga LSI.
Aminado man ini nga wala sang proper coordination sa barangay ang una nga nakapauli nga mga LSI nga wala pa nag-abot ang resulta sang swab test antes ang ila graduation sa 14-day mandatory quarantine.
