Aminado ang chairman sang committee on transportation sa Sangguniang Panlungsod sang Bacolod nga kulang ang pagpatuman sang mga ordinansa sa ciudad gani nagapadayon ang mga violators sang ila ginahimo.
Suno kay Bacolod City Councilor Al Victor Espino, may failure sa enforcement sang layi batok sa overloading kag ginakasubo niya nga natabo ang aksidente sa Purok Kasilingan, Barangay Mansilingan sang Hunyo 19 kun sa diin nautod ang kamot sang isa ka Grade 11 student nga babayi.
Suno kay Espino, madamo ang ordinansa sa Bacolod nga base sa national law nga indi mapatuman sang husto.
Kun magkuha sang business permit ang tag-iya sang tricycle suno sa konsehal, nakabutang diri ang sitting capacity nga duha sa atubang kag duha man sa likod, samtang ginadumilian naman ang pagpasakay sa backride.
Suno diri, mahimo nga wala nagabasa ang pinuno sang opisina nga nagapatuman sang ordinansa ukon indi ini makaintindi sang iya ginabasa.
Ginpanindugan sang committee chairman nga bisan ano pa kadamo ang ordinansa sa Bacolod kun indi ini pag-ipatuman, mangin wala ini sang kapuslanan.
Suno kay Espino, indi makamandu ang city government sa mga miyembro sang Philippine National Police bangud co-equal na ang ila gahum.
Magaduso naman si Espino sang resolusyon sa session sang Sangguniang Panlungsod sa masunod nga semana nga ipatuman ang mga ordinansa sa ciudad.
Suno kay Espino, may executive function ang Bacolod Traffic Authority Office gani sila ang mapatuman sang ordinansa samtang para naman sa legislation ang ginahimo sang City Council.
Bangud sini, nakahanda si Espino nga ipatawag si BTAO head Police Major Junji Liba sa isa ka legislative inquiry in aid of legislation agud nga maathagan ang tanan.
