Nagpanindugan ang chairman sang committee on transportation sa Sangguniang Panlungsod sang Bacolod nga wala pa sang basehan sang Bacolod Traffic Authority Office kag ang private nga service provider sang towing kag clamping equipment kun pila ang ila isukot sa tag-iya sang salakyan nga ginguyod bangud naglapas sa no parking policy sa Dalan Lacson.
Sa interview sang Bombo Radyo kay City Councilor Al Victor Espino, gin-amyendahan ang ordinansa agud nga mangin updated sa kinahanglanon sang subong nga panahon.
Suno diri, may yara sang memorandum of agreement sa tunga sang Bacolod City government kag sang Metro Towing Services nga yara pa sa deliberation sang Sangguniang Panlungsod kag ginapaidalom pa sa fine tuning paagi sa committee on transportation, kag ini ang diskusyunan sa session sang SP bwas, Oktubre 11.
Ini ang magalabay sa committee on laws and ordinances bangud diri nakasaad kun pila ang isukot nga rates, santo sa ordinansa.
Suno kay Espino, nagakuha ang BTAO sang policy sa Bacolod Traffic Authority Council matapos nga mascrutinize kag mavalidate sang Konseho, gani ang anuman nga policy ang indi mapatuman kun wala sang approval sang SP.
Bangud nagsugod na kahapon ang pagclamp kag pagtow sa mga salakyan nga nagpark sa no parking area, wala sang basehan ang BTAO kag ang towing services kun pila ang isukot sini sa tag-iya sang salakyan.
Panindugan sang konsehal, wala sang basehan sa suktanay sang towing kag clamping ilabi na nga pribado nga kompaniya ang naga-tow kag nagaclamp.
