Indi pabor ang chairman sang inter-agency task force againts coronavirus sa ciudad sang Bacolod nga mag-home quarantine nalang ang mga asymptomatic nga mga COVID-19 patients.
Madumduman nga sang damlag lang nagpahayag ang Department of Health nga pwede maghome quarantine ang mga may yara lamang sang mild flu-like symptoms kag asymptomatic patients basta nagasunod ang mga ini sa husto nga quarantine guidelines kag may yara sang kaugalingon nga kwarto kag banyo kag wala sang may kaupod nga vulnerable.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga nahimo na nila ang amo nga tikang sadto kun sa diin ila napapuli ang mga pasyente pagkaligad sang lima tubtob 10 ka adlaw apisar nga wala pa nakagwa ang ila nga test result apang madamo sa gihapon ang mga wala gasunod sa protocol kag mga nagapasaway.
Gani nabudlayan sila magcontact trace kun magpositibo ang mga ini bangud madamo na sila sang nakadtuan nga lugar.
Nagapati man si Familiaran nga mas maayo nga magtinir anay sa mga quarantine centers samtang nagapaayo kag nagahulat sang resulta agud malikawan ang risgo sang paglapta pa gid sang virus.
Ilabi na subong suno sa iya nga madamo na ang kaso sang local transmission sa ciudad.
Ginkumpirmar man sang bise alkalde nga wala pa sila nakabaton sang memorandum circular nagikan sa DOH.
Suno sa iya, indi man siya maka-speculate sang desisyon ni Mayor Evelio “Bing” Leonardia gani mas maayo nga hulaton nalang ang mando. Samtang, ginalauman na ni Bacolod City Vice Mayor El Cid Familiaran nga may maga-inabot pa gid nga mga locally stranded individuals sa ciudad.
‘Sa interview sang Bombo Radyo Bacolod kay Familiaran, chairman sang inter-agency task force against COVID-19 sa ciudad, ginpahayag sini nga nagtawag kahapon ang Presidential Management Staff (PMS) sa iya agud magpahibalo nga may mga LSIs nga magapauli sa Bacolod kun sa diin ishoulder sang Malacañang ang plete sang mga ini.
Suno kay Familiaran, iga-facilitate sang national government ang travel expenses sang pila ka mga LSIs nga wala sang ikasarang nga magplete papuli sa ciudad.
Nagpangayo man ang PMS sang numero sang mga available beds sa mga quarantine facilities.
Suno kay Familiaran, nakahanda na karon ang Mansilingan Agro Industrial High School nga magbaton sang masobra 200 ka mga returning Negrenses.
Nahibaluan nga kabahin ini sa mga eskwelahan nga ginrequest sa Department of Education nga pagagamiton bilang dugang nga pasilidad.
Kahapon ginbisita na ni Bacolod City Mayor Evelio “Bing” Leonardia ang eskwelahan agud tsekyaron kun handa na ini.
Nagpasalig naman ang city government nga ila gid ginatinguhaan nga ma-akomodar ang mga returnees.
