Nakibot bisan ang chairperson sa Committee on Tourism sa Sangguniang Panlungsod sang Bacolod sang mahibaluan nga karun lang nahatag ang consolation prices sang mga Barangay nga nagpasakop sa Masskara Street Dance and Arena Competition.
Sa interview sang Bombo Radyo Bacolod kay Councilor Jason Villarosa, ginkakibot sini sang naggwa sa facebook sang Huwebes ang impormasyon nga bag-o palang marelease sang Yuhum Foundation ang consolation prices.
Natingala man ini nga makaligad pa sang tatlo ka bulan antes nahatag ang premyo.
Suno diri wala pa sila nakameeting sa Yuhum Foundation kag iya pa nga ipadangat kay Bacolod City Mayor Alfredo “Albee” Benitez ang nasambitan nga delay.
Ginalantaw sini nga rasun amo ang problema sa liquidation, kag mahimo nga gintapos pa ang liquidation antes ginrelease ang pondo.
Apang nahangpan man sang konsehal nga naggasto man ang tagsa ka mga Barangay kag mahimo may mga balayran pa sa suppliers kasubong man sa talent fees sang mga dancers.
Suno kay Villarosa, nahatag gilayon ang P1 million nga nadag-an sang champion kasubong man sang mga runner-ups, kag ang nadelay lamang amo ang consolation prices sang mga nagpasakop nga Barangay.
Aminado man ini nga deficit man ang income sa Masskara Festival nakaligad nga tuig, apang ini ang indi tuman kadako kun ipaanggid sang 2022.
Apisar dako ang deficit sa 2022 Masskara Festival, wala naman sang kaangay nga solvent cases sa pagbayad sa mga participation Barangays.
Sa pihak sang deficit, maathag man nga nagsanyog ang ekonomiya sa ciudad sang Bacolod sa sinemana nga selebrasyon.
Pahayag ni Villarosa nga may obligasyon ang Yuhum Foundation nga ipresentar ang liquidation sa Sangguniang Panlungsod para sa transparency.
Nagalaom ang konsehal nga subong palang nga Enero makapasa na sang letter of intent anvg Yuhum Foundation nga sila ang liwat nga magaplastar sang programa para sa 2024 Masskara Festival.
Ini agud Pebrero pa lamang, sarang na nila magamit ang pangalan sang ciudad sa pagpatigayon sang mga deals sa pagpangita sang mga mangin sponsors.
