Ginpanindugan sang chairperson sa Committee on Transportation sa Sangguniang Panlungsod sang Bacolod nga ginhimo na sang administrasyon ang tanan nga sarang nga mabulig para sa mga traditional jeepney drivers kag operators agud makapartisipar sa public utility vehicle modernization program.
Sa interview sang Bombo Radyo Bacolod kay Councilor Al Victor Espino, sa pihak sang pagtinguha sang city government nga mabuligan ang mga apektado, ang Bacolod Alliance for Commuters Operators and Drivers (BACOD) ang may-ara sang lain nga dereksyon.
Suno diri, ang Sangguniang Panlungsod ang nakapasar na sang duha ka resolusyon kag ginpadala na sa concerned national government agency kalakip na ang position paper kag transcript.
Ang mga nagapanguna nga ahensya nga imbulbado amo ang Department of Transportation (DOTr) kag Land Transportation Franchising and Regulatory Board (LTFRB).
Suno kay Espino, padayun sila nga nagapamati sa panawagan sang mga ini, apang nakita man nila nga ang BACOD ang wala sang iban nga plano kundi ang pamatukan ang programa.
Paathag sang konsehal nga may iban nga grupo sang traditional jeepney ang nagsulod na sa consilidation kaangay sang Sentrong Samahan ng mga Tsuper at Operators Negros (SSTONE) kag Federation of Bacolod City Drivers Association Incorporated (FEBACDA).
Bangod sini, ang Bacolod City Government ang naghingyo na sang pahanugot sa LTFRB nga makabukas sang isa pa ka routa para sa mga bag-o nga nagsulod nga grupo.
Paathag ni Espino nga may mga ginapamatukan man ang SSTONE kag FEBACDA apang sila ang nag-upod sa modernization program, samtang ang BACOD ang luyag naman nga ini ang mapunggan.
Suno diri, ang Bacolod City ang isa sa mga local government units (LGUs) nga compliant na nga makapatigayon sang full implementation sang PUV modernization program bangod may-ara na sang Local Public Transport Route Plan, nga nagakahulugan nga sarado na ang prangkisa sa ciudad.
Paathag sini nga dapat nga mahangpan sang mga nagaprotesta nga ang LTFRB amo ang naga-award sang prangkisa, naga-aprubar sang routa kag nagahatag sang provisional authority agud makabyahe.
Samtang ang papel naman sang city government amo ang magfacilitate sa pagpatuman.
Suno kay Espino, deretso na sang BACOD kun indi sila magsulod sa PUV modernization program apang dapat man nila atubangon ang konsekwensya sa ila ginpili nga desisyon.
