Ginpahayag sang chief executive officer sang Metro Bacolod Chamber of Commerce and Industry (MBCCI) nga bilyones pesos ang madula sa ekonomiya bangod sa epekto sang African Swine Fever kag Hog Cholera.
Sa interview sang Bombo Radyo kay Frank Carbon, linibo ka mga trabaho kag palangabuhian sang tawo ang madula bangod sa ASF kag hog cholera.
Suno diri, ini mangin resulta sang manubo nga income kag mahinay nga paglibot sang kwarta sa siyudad nga magatuga sang pagkaguba sang ekonomiya.
Wala lamang sini ginlantaw ang ekonomiya sang siyudad sang Bacolod apang ginlantaw man sini ang ekonomiya sang iban nga siyudad kag banwa.
Pahayag ni Carbon, bangod nga may yara sang sakit nga nagalapta sa baboy, madamo sang konsumedor ang magapili nga magbakal na lang sang karne sang baka apang ini ang mahal naman.
Dugang pa niya, sa karun nga manubo ang supply sang baboy, manubo man ang produkto sang processed products gani dako nga negosyo ang madula.
Gin-athag man sini nga indi maregulate sang gobyerno kun ano ang presyo nga ipatuman sang mga manugbaligya sang baboy.
Suno kay Carbon, ang pagpanubo sang presyo sang mga manugbaligya sang baboy ang bangod nga sila nagapanic na sa ASF kag hog cholera kag sila nagdesisyon na lang nga ibaligya sa manubo nga presyo kumpara nga wala na sila sang makuha pa nga kwarta.
Nagpanawagan man ini sa mga punong barangay kag mga opisyales sang barangay nga I-monitor ang mga nagabaligya sang mga baboy sa kilid-kilid nga dapat mag-agi gid ang mga ini sa accredited nga ilihawan.
