Nagdepensa ang chief of hospital sang Valladolid District Hospital angot sa alegasyon sang pamilya Jambaro.
Sa interview sang Bombo Radyo Bacolod kay Dr. Myre Parpa, ginpahayag sini nga ila gid gin-facilitate ang pasyente nga si Ruben Jambaro, 54-anyos agud nga marefer ini sa iban nga ospital sa Bacolod.
Suno sa iya, nag-obra sila sang referral apang wala sang may mabaton nga ospital sa pasyente.
Suno kay Parpa nga sang ila pagtawag sa Corazon Locsin Montelibano Memorial Regional Hospital (CLMMRH), indi sila magbaton sang pasyente bangud wala na sang bakante nga bed kag ventilator.
Nagtinguha man sila nga magtawag sa iban pa nga mga pribado nga ospital sa Bacolod apang wala man ang mga ini sang bakante nga isolation ICU.
May yara man sang regular ICU sa BAMC apang nagakinahanglan sang downpayment.
Samtang, ginpanindugan man sini nga kun mapatay ang isa ka suspected COVID patient, gina-endorso ini dayon sang ospital sa local government unit (LGU) bangud kinahanglan nga malubong ang pasyente sa sulod sang 12 oras apisar nga wala pa nakagwa ang swab test result.
Suno kay Parpa, ang LGU na ang naga-kontak sa pamilya kag sa punerarya angot diri kag wala na sang kontrol ang ospital sa pagpahibalo sa pamilya bangud nga ang pag-endorso gid lamang sang pasyente ang ila nga papel.
Dugang pa sini nga imposible man nga wala gid nakahibalo ang pamilya Jambaro nga ilubong na ang ila himata bangud nga antes makuha sa punerarya ang bangkay, kinahanglan nila anay nga magbayad.
