Ginmanduan sang Chief of Staff sang Armed Forces of the Philippines ang mga militar sa Isla sang Negros nga mangin agresibo samtang nagahuyang na ang mga rebelde nga grupo agud matuldukan na ang problema sa insurhensya sa isla sang Negros Occidental kadungan sang pagbisita sini sa headquarters sang 62nd Infantry Battalion sang Philippine Army sa Barangay Libas, Isabela, Negros Occidental kahapon.
Suno kay General Andres Centino, sa iya pagbisita sa headquarters sang 62nd Infantry Battalion sang Philippine Army, ginsapol sini ang commanders agud pahanumduman nga indi mag-untat sa paglagas sa mga rebelde bangud nga wala pa natapos ang ila trabaho.
Ini sa kasunod sang nagluntad nga engkwentro sa tunga sang militar kag sang New People’s Army sa banwa sang Moises Padilla sadtong Mayo 20 kag sa syudad sang Guihulngan sang Mayo 21 kun sa diin siyam (9) ka mga rebelde ang napatay.
Suno kay Centino, sa bug-os nga pungsod, naghina na ang pwersa sang rebeldeng NPA kag samtang nga mahuyang ang pwersa dapat nga indi mag-untat ang mga suldado sa pagpatigayon sang military operations agud nga matuldukan na ang insurhensya.
Nagalaom man si Centino nga masolbar na ang insurhensya sa probinsiya sa labing madali nga panahon.
Samtang, ginkalipay sang pamunuan sang 62nd Infantry Battalion sang Philippine Army ang pagbisita ni General Centino agud nga mapasidunggan ang walo ka tropa sang 62nd Infantry Battalion sang Philippine Army sang medalya nga papuri matapos nga nangin kabahin sa engkwentro batok sa mga rebelde sa banwa sang Moises Padilla kag Guihulngan City sa Negros Oriental.
Magluwas sini may ginpromote man nga duha ka mga babayi nga army officials nga ginalakipan sang 2Lt ginpromote sa 1LT kag ang 1Lt ginpromote sa ranggo nga Captain.
Kahapon ginpresentar man sa atubang katapo sang media ang mga narecover nga mga high powered firearms, subversive documents kag mga personal belongings sang mga NPA sa encounter site.
Yara man sa headquarters sang 62nd Infantry Battalion kahapon kadungan sang pagbisita sang AFP Chief of Staff si Isabela Mayor Irene Montilla, Vice Mayor Juan Miguel Montilla, 303rd Infantry Brigade Commander Brigadier General Orlando Edralin kag 302nd Infantry Brigade Commander Col. Joey A Escanillas.
Gin-abi-abi man ni Himamaylan City Mayor Raymund Tongson si General Centino sang ini ang nagpatigayon sang courtesy call sa City Mayors Office sang Himamaylan City.
