Ginpahayag sang anay kongresista nga nagserbe chief prosecutor sa impeachment trial batok kay former Chief Justice Renato Corona nga madamo sang komplikasyon sa wrong timing nga impeachment complaint batok kay Vice President Sara Duterte.
Sa interview sang Bombo Radyo Bacolod kay former Iloilo 5th District Representative Niel Tupas, sa pagfile pa lamang kuntani sang una nga complaints, 10 session days lamang dapat ini ang napasaka na sang House Secretary General sa Office of the House Speaker.
Suno diri, kaangay nga ginhold ang complaints sang halos duha ka bulan, gani nakibot ini nga gulpyada na lamang ginpasaka ang articles of impeachment sa Senado sa pagpirma sang 215 ka mga Kongresista.
Pahayag sini, nga sang Disyembre pa lamang kuntani nagtipon na sang one-third sang Kamara agud natalakay gilayon sang Senado sang pagbukas sang session sang Enero.
Paathag ni Tupas nga alang-alang na sa karun ang oras bangod may campaign period kag mabudlay na para sa mga Senador nga tutukan ang impeachment complaint.Dugang pa sini nga indi man asod-asod nga makaconvene ang Senado bangod madamo pa sang dapat ipreparar.
Paathag sini nga sa pagbukas sang impeachment court, maga-untat ang function sang Senado kag ang Kamara ang magahatag man sang full support.
Samtang kun ini ang talakayon sa pagbukas sang session sa Hunyo 2, indi na matapos ang impeachment trial tubtob magtakop ang 19th Congress sa Hunyo 30 kag ini ang mahimo ma-abolish.
Ini bangod indi mahimo nga lain nga set sang Kongresista kag Senador ang maga-atubang sang kaso nasuguran na sang iban.// Panindugan ni Tupas nga ang impeachment ang dapat last resort na lamang.
Sa pihak sini, bilang labing una nga impeachment trial nga nangin madinalag-on, suno sa former Chief Prosecutor nga kuntani gingamit nga giya sang karun nga mga Kongresista ang ila nangin proseso.
Kun sa diin ginsegurado nila nga may nagakaigo pa nga tiyempo kag may mataas nga tyansa sa pagdaog antes ginfile ang impeachment complaint.
Aminado ini nga ang karun nga sitwasyon ang makatuga sang pressure sa mga Senador kag may legal kag technical nga konsekwensya.
